ភ្នំពេញ៖ អគ្គលេខាធិការក្រុមប្រឹក្សាសកម្មភាពជនពិការ លោក ឯម ច័ន្ទមករា បានស្នើសុំដល់អង្គការស្ដារលទ្ធភាពពលកម្មអន្តរជាតិកូរ៉េ (RI Korea) ពង្រីកគម្រោងស្ដារលទ្ធភាពពលកម្មកាយសម្បទានៅកម្ពុជាតាមរយៈជំនួយជារទេះរុញ ឈើច្រត់មកកាន់ក្រុមប្រឹក្សាដើម្បីចែកជូនដល់ជនមានពិការភាពដែលមានតម្រូវការ។ លោកលើកឡើងបែបនេះក្នុងពិធីចុះកិច្ចព្រមព្រៀងសហការស្ដីពីគម្រោងការធ្វើឱ្យប្រសើរនូវសេវាស្តារលទ្ធភាពពលកម្មប្រកបដោយលក្ខណៈងាយស្រួលសម្រាប់ជនមានពិការភាពនៅព្រឹកថ្ងៃពុធ ទី៣ ខែសីហានេះ។ 

ក្នុងជំនួបនោះលោក ឯម ច័ន្ទមករា បានលើកឡើងថាកូរ៉េមានភាពរីកចម្រើនក្នុងការបង្កភាពងាយស្រួលដល់ជនមានពិការភាពជាងកម្ពុជាទាំងសេវាថែទាំ និងស្ដារកាយសម្បទាដែលលោកជំរុញដល់អង្គការ RI Korea ឱ្យពង្រីកគម្រោងជំនួយបន្ថែមក្រៅពីមន្ទីរពេទ្យអង្គស្នួល ដោយបន្ថែមនូវជំនួយជាសម្ភារៈគាំទ្រ។ 

អគ្គលេខាធិការនៃអង្គការ RI Korea លោកស្រី យូ មីយុងវ៉ា (You Myunghwa) គាត់មកប្រទេសខ្មែរលើកទី៣ ដើម្បីជួយដល់មន្ទីរពេទ្យខាងផ្នែកស្តារលទ្ធភាពឱ្យខ្លាំងជាងគេនៅកម្ពុជា។ លោកស្រីបន្ថែមថា ពេលនេះគាត់បានជួយដល់មន្ទីរពេទ្យនៅស្រុកអង្គស្នួល ជួយលើការបណ្តុះបណ្តាលដល់គ្រូពេទ្យ ជួយដល់ការបណ្តុះបណ្តាលដល់មន្ត្រីខាងផ្នែកស្តារថែមទៀតអោយបានយល់ដឹងពីជំនាញនេះ ពិសេសខាងផ្នែកស្តារសម្បទាខាងចលនានិងផ្នែក IT ដើម្បីស្រង់ទិន្នន័យ។ ចំពោះគម្រោងក្នុងការស្ដារលទ្ធភាពពលកម្មកាយសម្បទានៅកម្ពុជាតាមរយៈជំនួយជារទេះរុញ ឈើច្រត់ នោះលោកស្រីនឹងរៀបចំគម្រោងដើម្បីគាំទ្រដល់កិច្ចការនេះ។ 

ប្រធានមជ្ឍមណ្ឌលជាតិផ្នែកស្តារនៃអង្គការ RI Korea លោក លី ប៊ឹម ស៊ុក (Lee Beom suk) បានលើកឡើងពីចំណាប់អារម្មណ៍លើគម្រោងមួយ ដោយធ្វើការបណ្ដុះបណ្ដាលជំនាញព្យាបាលដោយចលនាដល់គ្រូពេទ្យជំនាញ លើកជូនលោកអគ្គលេខាធិការផងដែរ។ 

ជាចុងក្រោយ លោកអគ្គលេខាធិការក៏បានលើកឡើងពីដំណើរការនៃការសាងសង់មជ្ឍមណ្ឌលជាតិជនពិការនៅក្នុងស្រុលអង្គស្នួលដល់អង្គការ RI Korea និងថ្លែងអំណគុណដល់អង្គការ RI Korea ដែលតែងតែជួយគាំទ្រដល់វិស័យពិការភាពនៅកម្ពុជា។ ជាមួយគ្នានេះផងដែរលោកក៏បានស្នើដល់កូរ៉េឱ្យពិចារណាជួយគាំទ្រដល់ការរៀបចំកិច្ចប្រជុំ CBID នៅឆ្នាំ២០២៣ខាងមុខផងដែរ៕